កណ្តាល ៖ ផ្លូវជាតិចំនួន៩ខ្សែ រួមមានកំណាត់ផ្លូវជាតិលេខ២,៣,៤,៥ ផ្លូវជាតិលេខ២០អា , ២១ , ២១អា និង ផ្លូវជាតិលេខ២១បេ ដែលស្ថិតក្នុងភូមិសាស្រ្តខេត្តកណ្ដាល ត្រូវបានមន្ទីរសាធារណៈការ និងដឹកជញ្ជូនខេត្ត សម្រេចបិទបណ្ដោះអាសន្ន ចំពោះ ចរាចររថយន្តដឹកទំនិញធុនធំគ្រប់ប្រភេទ ។
យោងតាមសេចក្តីជូនដំណឹង របស់មន្ទីរសាធារណការ និងដឹកជញ្ជូនខេត្តកណ្ដាល ចេញនៅយប់ ថ្ងៃទី១៤ ខែតុលា ឆ្នាំ២០២០នេះបានបង្ហាញថា ដោយស្ថានភាពជំនន់ទឹកភ្លៀង បាន និងកំពុងជន់ឡើងយ៉ាងខ្លាំង បណ្តាលអោយទឹកលិចផ្លូវមួយចំនួន នៅក្នុងខេត្តកណ្តាល ស្ថានភាពបែបនេះ ធ្វើអោយផ្លូវ-ស្ពាន មិនអាចទ្រាំទ្រ នឹងទម្ងន់រថយន្តដឹកទំនិញធុនធំ បានទេ បង្កឱ្យខូចខាតផ្លូវ និងស្ពាន ។
ដូចនេះ ចរាចររថយន្តធន់ធ្ងន់ ត្រូវបានបិទជាបណ្ដោះអាសន្ន ចាប់ពីពេលចេញសេចក្ដីជូនដំណឹងនេះតទៅ រហូតមានការសម្រេចជាថ្មី ។ សេចក្ដីលម្អិត សូមអានសេចក្ដីជូនដំណឹង នៅខាងក្រោម ៕
