(ស្វាយរៀង)៖ ពានរង្វាន់បាល់ទាត់ស្វាយរៀងខាប់ ឆ្នាំ២០២០(Svay Rieng Cup 2020) បានរកឃើញបេក្ខភាពឡើងវគ្គ ១៦ក្រុមចុងក្រោយ(១/៨ ផ្ដាច់ព្រ័ត្រ) ចំនួន ៦ក្រុមហើយ បន្ទាប់ពីឆ្លងកាត់ការប្រកួតវគ្គជម្រុះ ៣២ក្រុមចុងក្រោយដ៏ស្វិតស្វាញរយៈពេល ២ថ្ងៃ នៅថ្ងៃទី១១-១២ ខែកក្កដា ឆ្នាំ២០២០។
ចំពោះបេក្ខភាពដែលបានកក់កៅអីវគ្គ ១/៨ ផ្ដាច់ព្រ័ត្រពានពាក់កណ្ដាលអាជីពខាងលើ រួមមានក្រុម សសយក ក្រុងបាវិត, ក្រុម សសយក ឃុំរមាំងថ្កោល, ក្រុមបក្សីស្វាយរៀង, ក្រុមយុវជនសាមគ្គី, ក្រុមពូប្រុសជីភូ, និងក្រុម Academy SVR។
សូមបញ្ជាក់ថា ការចាប់ផ្តើមដំណើរការប្រកួតពាន Svay Rieng Cup ឡើងវិញនេះ ក្រោយមានការអនុញ្ញាតិពីរាជរដ្ឋាភិបាលឲ្យមានការប្រកួតកីឡាដំណើរការជាជំហ៊ានៗ និងអនុវត្តន៍តាមវិធានណែនាំរបស់ក្រសួងសុខាភិបាល ដូចជាការវាស់កំដៅ និងបាញ់អាល់កុល ចំពោះកីឡាករ និងមន្ត្រី ដែលពាក់ព័ន្ធទាំងអស់ មុនចូលបរិវេណទីលានប្រកួត តែមិនអនុញ្ញាតិឲ្យទស្សនិកជនចូលទស្សនាផ្ទាល់ឡើយ។
គួរំលឹងថា ពាន Svay Rieng Cup បានបង្កើតឡើង៥រដូវកាល ចាប់ពីឆ្នាំ២០១៥ រហូតដល់បច្ចុប្បន្ន ក្រោមការផ្តួចផ្តើមរបស់លោក ឌី វិជ្ជា អនុប្រធានសហភាពសហព័ន្ធយុវជនកម្ពុជា និងជាប្រធានសហភាពសហព័ន្ធយុវជនកម្ពុជា ខេត្តស្វាយរៀង ក្នុងគោលបំណងបង្កើតឲ្យមានសកម្មភាពកីឡា ដើម្បីជាប្រយោជន៍ដល់យុវជន មហាជន ក៏ដូចជាប្រជាពលរដ្ឋក្នុងខេត្ត មានឱកាសចូលរួមលេងកីឡា ដើម្បីសុខភាព មិត្តភាព និងសាមគ្គីភាព ជាសឆ្ងាយពីការប្រើប្រាស់គ្រឿងញៀន និងអំពើអបាយមុខផ្សេងៗ៕
