បន្ទាយមាជ័យ៖ ជនសង្ស័យម្នាក់ឈ្មោះ សាញ់ សុខា ភេទប្រុសអាយុ ៥២ឆ្នាំ រស់នៅភូមិ៤ សង្កាត់ព្រះពន្លា ក្រុងសិរីសោភ័ណ ត្រូវបានសមត្ថកិច្ចចាប់ខ្លួននៅរសៀលថ្ងៃទី១ ខែធ្នូ ឆ្នាំ២០២០ ពីបទមិនរាងចាលជួញដូរថ្នាំញៀន។
លោកវរសេនីយ៍ទោ ស្រី សុខុម នាយការិយាល័យនគរបាលប្រឆាំងគ្រឿងញៀនខេត្តបន្ទាយមានជ័យ បានឱ្យដឹងថា បុរសម្នាក់នេះធ្លាប់ជាប់គុក ៥ឆ្នាំរួចមកហើយ នៅពេលបានចេញពីគុកមកវិញ មិនកែខ្លួន បែរជាបន្តលក់ថ្នាំញៀនខ្លាំងជាងមុនទៀត។
ក្រោយការចាប់ខ្លួន សមត្ថកិច្ចបានធ្វើការដកហូត វត្ថុតាងថ្នាំប្រភេទគ្រាប់Wyចំនួន ៣២គ្រាប់, ម្សៅក្រាមពណ៌សថ្លាចំនួន ១៣កូនថង់តូច, បំពង់ជក់១, ដែកកេះ ៥ដើម, និងសំបកថង់ផ្លាស្ទិកមួយចំនួនទៀត។
ជនជួញដូរថ្នាំញៀនរូបនេះ បានលួចលក់ថ្នាំញៀន នៅចំណុចផ្ទះជនសង្ស័យ ជាប់របងវត្តសមាធិផល ស្ថិតនៅភូមិ៤ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។ បច្ចុប្បន្នជនសង្ស័យត្រូវបានបញ្ជូនទៅឃុំខ្លួនតាមនីតិវិធី៕
